Ҳоким мурожаат билан келган фуқарога раҳмат айтди
Бугун тумандаги Халқ қабулхонаси биносида Оқдарё туман ҳокимининг навбатдаги қабули бўлиб ўтди. Унда 30 дан ортиқ фуқароларнинг уй-жой, моддий ёрдам ажратиш, газ баллон, алимент, тиббий ёрдам каби масалалардаги мурожаатлари эшитилди ва масъулларга бириктирилиб, ижроси назоратга олинди.
Қабул давомида айрим мурожаатларни жойида ҳал этиш чоралари кўрилди. Жумладан, Бобур маҳалласидан I гуруҳ ногиронлиги бўлган фуқаро А.Ибрагимовнинг ҳозирда олий ўқув юртининг 4-курсида таълим олаётганлиги ва таълимдан бўш вақтида ўқитувчилик қилиш ниятида иш сўраб қилган мурожаати жойида қаноатлантирилди.
-Раҳмат, шу болага. Ногиронлиги бўлсада ўзи меҳнат қилиб пул топишни истаяпти. Бу каби виждонли инсонларни ҳамиша қўллаб-қувватлашимиз керак, -дея ҳоким миннатдорчилик билдирди ва туман ХТБ мутасаддиларига тегишли тартибда ишга олиш бўйича топшириқлар берди.
Оқдарё туман ҳокимлиги ахборот хизмати